हीरक महोत्सव

प्रतिकूल परिस्थितीवर मात करत शिक्षणाची ज्योत तेवत ठेवणाऱ्या रत्नागिरी जिल्हा मराठा ज्ञाती समाज, मुंबई संचालित बालविकास विद्यामंदिर, जोगेश्वरीच्या सहा दशकांच्या गौरवशाली शैक्षणिक वाटचालीचा हीरक महोत्सव समारंभ मोठ्या उत्साहात आणि दिमाखदार वातावरणात साजरा करण्यात आला. विद्यार्थ्यांचा उत्साह, शिक्षकांचा गौरव आणि संस्थेच्या भविष्यातील वाटचालीचा संकल्प यामुळे हा सोहळा संस्मरणीय ठरला.

या भव्य सोहळ्यास मुंबईचे उपमहापौर मा. संजय घाडी, स्थानिक आमदार मा. अनंत (बाळा) नर आणि नगरसेविका श्रीमती नाजिया अब्दुल जब्बार सोफी प्रमुख पाहुणे म्हणून उपस्थित होते.

कार्यक्रमाची सुरुवात महाराष्ट्र गीताने झाली. प्रमुख पाहुण्यांचे विद्यार्थ्यांनी आरएसपीच्या माध्यमातून शानदार मानवंदना देत आणि लेझीम पथकाच्या आकर्षक सादरीकरणातून जल्लोषात स्वागत केले. विद्यार्थ्यांच्या शिस्तबद्ध संचलनाने आणि लेझीमच्या तालबद्ध सादरीकरणाने उपस्थितांची मने जिंकली.

यानंतर प्रमुख पाहुण्यांच्या हस्ते रत्नागिरी जिल्हा मराठा ज्ञाती समाज संस्थेच्या rjmdsmumbai.in या अधिकृत वेबसाईटचे उद्घाटन व लोकार्पण करण्यात आले. संस्थेच्या शैक्षणिक व सामाजिक कार्याची माहिती आधुनिक तंत्रज्ञानाच्या माध्यमातून जगभर पोहोचविण्याच्या दृष्टीने हे पाऊल महत्त्वाचे मानले जात आहे. तसेच हीरक महोत्सवानिमित्त उभारण्यात आलेल्या स्मृतीचिन्हाचे अनावरण उपमहापौर श्री. संजय घाडी यांच्या हस्ते करण्यात आले.

व्यासपीठावर मान्यवरांचे आगमन झाल्यानंतर विद्यार्थ्यांनी सादर केलेल्या सुमधुर स्वागतगीताने वातावरण भारावून गेले. संस्थेचे अध्यक्ष मोतीराम विश्वासराव, कार्याध्यक्ष सहदेव सावंत, तसेच उपकार्याध्यक्ष गणपत तावडे, अशोक परब, सरचिटणीस जितेंद्र पवार आणि खजिनदार विनोद बने यांनी मान्यवरांचे शाल, स्मृतीचिन्ह व पुष्पगुच्छ देऊन स्वागत केले.